Thursday, February 28, 2008

جربت..؟؟؟


جـربــــت
جربت مره تعيش مفيش جواك أمل
كل الحياه عندك يجوز أو محتمل
حلم الحياه عندك .. رغيف
أو نومه هاديه على الرصيف
وبرد خوفك خلاك تـتكتــك
والجو صيف
طول النهار
صوت المدافع فـ البـيوت
واحد يموت
كام قلب حبه عليه يموت
بقت الحياه لا تحـتمل
نزل السكوت وخيم الجوع والفشل
جربت مره تعيش مفيش جواك أمل
صدق اللي قال
ملهاش أمان
ملناش مكان
في حضنها
ماشيين عليها
فـ ثانيه نبقى فـ بطنها
وفـ لحظه نصبح ذكريات
أوقات وعدو فـ عمر فات
واللي أتولد دلوقتي مات
خط الحياه عنده اكتمل
جربت مره تعيش مفيش جواك أمل

15 comments:

she3ila said...

يسلم قلمك يا ابو حميد اسلوبك بيطور بسرعة
بس انا مش متخيل ازاى نعيش من غير امل او حتى نموت من غير امل
يا نعيش راسمين امل وكل يوم بنندهو
يا نموت عشان امل هاييجى بعدنا اللى يحققو

Heba said...

اسلوبك متميز جدا

بس أنا مع الرد اللي قبلي ما ينفعش نعيش من غير أمل

مش هنقدر .. حتى لو كان حاجة صعب تتحقق بس اهو على الأقل بيدينا دفعة وهدف نعيش علشانه

تحياتي لقلمك المبدع

عـمـرو قـطامـش said...

صراحة انا مجربتش و لا مرة اعيش جوايا مفيش امل و بصراحة كل الحياة عندى يجوز او يحتمل
... بصراحة الرد ده على الاخوة اللى علقوا
الراجل لا يققصد الا انه يلفت نظرنا الى مناهية الموضوع مش الدعوه لنفيه

maha zein said...

هاي عصام ...انا مها زين
كده يا راجل اكتشف بالصدفة البحتة انك عامل مدونة ومتقولش...عموما هعديها المرة دي...اد ايه انا سعيدة عشان هقدر اقرا كل كتاباتك واشعارك براحتي...ومش هستني حفلة ولا مسابقة ولا مهرجان عشان اسمعلك حاجة
ضفتك عندي في قائمتى المفضلة
ايون كده حسسني بالايام الحلوة وجو الجامعة وكده.
عموما انا قلت اكتب تعليقي الاول وبعدين بقه اغوص في المدونة...واقرا كل حاجة...ويا رب الاقي كل القصايد والاشعار الي كنت بحبها.
اتمني زيارتك ليا في مدونتي المتواضعة.
ويا ريت تشيل الكلمة السرية دي الي بنكتبها قبل ما نعلق عشان بتخنق اوي يا جدع اي حد بيعلق
سلام

جسر الى الحياة said...

احييك يا احمد على كلماتك المعبرة ومتهيالى مفيش حد عنده خط الحياة اصبح مكتمل دائما ينقصنا شىء لنستكمله ويبقى فى نفوسنا الامل اللى هنحقق بيه كل احلامنا

mohamed said...

اسلوبك جميل يا احمد بجد
احساس عالى قوى وقلم متميز
قصيدة راقيه
اشوفك بين حروفك
تحياتى

Whispers just for a Night said...

نصرة منكم لرسول الله صلى الله عليه وسلم من فضلكم توجهوا للوصلة أدناة وضعوا البانرات في مدوناتكم فمن الدانيمارك إلى هولندا إلى الجزيرة ثم إلى أين؟؟؟؟؟؟؟؟؟
جزاكم الله عن نبيكم خيرا

http://nosra.islammemo.cc/websites.aspx

dramaqueen said...

احييك بشدة
البوست جميل جدا
وجربت كتير اموت عشان معنديش امل
لكنى بارجع واعيش واقول انااحسن من ناس كتير

الحمد لله

غادة الكاميليا said...

مممممممممممممم
ملناش مكان
في حضنها
ماشيين عليها
فـ ثانيه نبقى فـ بطنها
.......
الجزء ده عجبنى بشده
:)
مبروك يافندم الكاس واوعى يكونوا خدوه منك
:)))

ادم المصري said...

مبروك يا احمد
والقصيدة فعلا جميلة جدا
تحياتي يا صعلوك

البدوى الأخرس said...

جميل يابو حميد
لغة بسيطه ومباشره
بتفكرنى بطلقات الرصاص
ودمت

marktwain said...

جميل كالعادة يا ابو حميد

تحياتي

DaRpShAmSaWy said...

يا صباح اللى بتغنى

ازيك يا كبير

مدونتك لذيذة ربنا يباركلك فيها

وخواطر اكتر من من انى اقول عليها حلوة
عيش يا معلم وبلاش قفش

اخوك الصغير

جيفارا

الحلم الأزرق said...

جميل أوي يا أحمد أنا مستنة الأعمال إللي بعد كدة
يا ريت متغبش علينا
آية أسامة

hesham said...

الله ينور عليك ياباشا

تسلم ايدك و دماغك

تحياتى
هش