Wednesday, December 3, 2008

............... للأسف


علا الدماغ وصل لحد القمر

زود كمان .. شاف نفسه غول

إنبهر

من وضعه ده حاول يفسر كل شىء

.......وللأسف

ضي النهار رجعله إحساس الخطر

Wednesday, July 2, 2008

صوت الحق


أخرس يا صوت الحق

تــايـهـه يــا كــلـمة لأ

مـــاشيه الحياه بالزق

ويــا ريتهــا بتعــــــدي

******

ولا حــق ولا مـحقوق

تــحلم بــــإيه ماتــفوق

مـاهو حلمنا المسروق

بــيموت عــــلى يــــــدي

******

فـــي الجـــي و الحاضر

لازم تــــقول.. حــــاضر

لازم تكــــون قـــــــــــادر

أنــــك مــــــــــتـحـلمـشي

******

Wednesday, May 14, 2008

حلمنا كلنا

أخيراً
الحلم بقى حقيقة
أول كتاب يتضمن أفكارنا
أول كتاب بدماغنا إحنا
عالم التدوين هيتنقل للقارىء البسيط
أكتر من 40 رأي ووجهة نظر
في كتاب واحد
حلمنا بقى حقيقه
يا كل مدونين مصر
شاركونا فرحتنا
حاولنا و قدرنا
وأكيد هنحقق حاجات أكتر
وأنتو معانا
العدد الأول من سلسلة
مدونات مصرية للجيب
هيشوف النور لأول مره
يوم الخميس 22/ 5
في مكتبة (عمر بوك ستورز) بشارع طلعت حرب
في وسط البلد فوق مطعم فلفلة
كلنا لازم نبقى هناك
ومستنينكو
دي أول خطوه
والطريق لسه طويل

Monday, April 28, 2008

من واقع دفتري القديم

لن أستكين
ولما تاه ما بيني وبينك
في ظلام القهر
وصرنا نحن أشلاءاً
رمانا الدهر
ولم يبقى لنا سبلاً
سواه الصبر
سوى أن أنتظر زمناً
لا أدري كيف يأتيني
أيأتي إلي مبتسماً
يناديني .. يواسيني
ويسكب خمره الوردي في كأسي
ويسقيني
أم سيأتي سابحاً فوق الدموع
وعلى جبينه قد كتب
أن لا رجوع
يأتي ويرمي فوق ظهري
هموم الناس
من قبل أن يأتي
محمد أو يسوع
سيكون همي حينها
ملأ الربوع
لكنني .. لن أستكين
وأكون كالدميه
نحركني السنين
بل أنني سأهب ثانية
لأبحث عن يقين
بين ألاف المأسي الراقده
فوق الأنين
بين الأماني الحائره
للعاشقين
مع العلم......
أن الفرح لن يأتي إلي طواعيه
لن يتركوا الأمال تنمو
فوق أرض السخريه
لن يتركوا الماء الطهور
يمر في بيت الخمور
أو أن تتوب المعصيه
لكنني .. لن أبقى يوماً واحداً
وأنا حزين
وسأوقظ الموتى
فقد مات الحنين
سيحاربون وأنتصر
وألف سيف ينكسر
لكنني..
لن أستكين
ملحوظه: هذه القصيده تعتبر التجربه الأولى لي في شعر الفصحى وهي أيضاً الأخيره وذلك لأنني شاعر عاميه ولكن حين وجدت هذه القصيده في أوراقي القديمه قررت أن أنشرها لإعجابي بهذه التجربه أياً ما كانت.

Thursday, February 28, 2008

جربت..؟؟؟


جـربــــت
جربت مره تعيش مفيش جواك أمل
كل الحياه عندك يجوز أو محتمل
حلم الحياه عندك .. رغيف
أو نومه هاديه على الرصيف
وبرد خوفك خلاك تـتكتــك
والجو صيف
طول النهار
صوت المدافع فـ البـيوت
واحد يموت
كام قلب حبه عليه يموت
بقت الحياه لا تحـتمل
نزل السكوت وخيم الجوع والفشل
جربت مره تعيش مفيش جواك أمل
صدق اللي قال
ملهاش أمان
ملناش مكان
في حضنها
ماشيين عليها
فـ ثانيه نبقى فـ بطنها
وفـ لحظه نصبح ذكريات
أوقات وعدو فـ عمر فات
واللي أتولد دلوقتي مات
خط الحياه عنده اكتمل
جربت مره تعيش مفيش جواك أمل

Friday, February 8, 2008

نفس القميص

نفس القميص

بقاله أكتر من سنة

ملبسش غيره

إحساس يغيظ

لما أبوك يكون معاه

ومتشوفش خيره

في الحاله دي

يا تحجم النار اللي قايده في جتتك

يا تروح تشوفلك

أب غيره

Thursday, November 22, 2007

العمود

الـــعــــمـــود
.
لما يبقى المخ فخ...و العينين تصبح كمين
و الحمامة تبقى رخ...و الحرامى يقول امين
يبقى ع الدنيا السلامه
يبقى كل الناس سلامة
بس مش لاقيين جهاد
و اللغة السايدة اللسكات
و الضمير الصاحى دايما
فجأه تسمع انه مات
و اللى مشمش........ فشفشوه
و اللى فشفش..........مجدوه
هبا يللا صوروه............جنب العمود
.
.
بقى رمز دنيتنا العمود
رمز الخيانة و الشرف
رمز المهانة و القرف
...... و الكبرياء
و اللى داء طعم العمود.. ماينسهوش
و اللى ما داءش .. مايحسهوش
و اللى عاش العمر كله ما يعرفوش
يبقى انتصر لما افتكر
ان الرضا طبعه السكات................
و الحلم بالاحسن فساد
.
.
لما آمن ان بكرة الجاى أحسن م اللى فات
لما عاش على فكرة انه
جزء منه الانكسار
لما تاه معنى البديل و الاختيار
لما كافح لجل قوته
لما زاد باديه قيوده
.... و الحدود
كل ده علشان بيهرب م العمود
لجل ما يعيش وسط ناسه
خاف يموت
مهمهوش حتى انه يبقى لعبه بايخة بالريموت
او ان احلام تتولد
من كتر خوفنا تتوأد
و مصير حياتنا يتعقد
نلقى الطريق مسدود
و رانا سيف بيشكنا ... ممدود
.......و مثبتين من تحت منا عمود