Friday, February 8, 2008

نفس القميص

نفس القميص

بقاله أكتر من سنة

ملبسش غيره

إحساس يغيظ

لما أبوك يكون معاه

ومتشوفش خيره

في الحاله دي

يا تحجم النار اللي قايده في جتتك

يا تروح تشوفلك

أب غيره

17 comments:

ادم المصري said...

هههههههههههه
.
.
تعرف ؟
واله حاولت
لا عرفت اقلع القميص
ولا عرفت اشوفلي اب غيره
.
.
.
وادي النتيجة .. النار اللي كات قايدة فجتتي انطفت .. بعد ما سابنتي كوم رماد

احـمـد عصـام said...

يا عزيزي كلنا بنحاول و على رأي اللي قال لا يأس مع الحياه ولا حياة لمن تنادي.

(( قيثارة الأحلام )) said...

مدونتك جميله اوى انت فعلا انسان حساس علشان كده يمكن جواك شويه حزن بس حوليه برائه واضحه بجد كلامك جميل
انا جيت اردلك الزياره واقولك انى سيبتلك تعليق على مدونتى ياريت تيجى تشوفه وربنا يوفقك

كرانيش said...

انا رايى ان هناك بدائل اخرى

حاول تبحث عنها
...

بس حلوه تشوفلك اب غيره دى
ماتيجى نروح السوق نشوفلنا ابين على ماقسم كده

dramaqueen said...

هههههههههه
كلامك جميل بس لو كنا بختار فى حياتنا كل شئ هتبقى الدنيا ملهاش طعم
لازم تعاند فينا ونعاند فيها

بس عامة مدونتك حلوة

Heba said...

لو كان الواحد ينفع يشوف أب غير أبوه

أو أم غير أمه

أو بلد غير بلده

مكنش حد غلب

ولا كنت أنت كتبت كلامك ده

تحياتي

مدونتك متميزة بجد

بس ليه كتاباتك قليلة كده

البدوى الأخرس said...

كلنا عايزين أب غيره بس مفيش حد قادر يتكلم يمكن بقاله كده أكتر من عمرك ولسه لابسه نفس الشخص
ومازلنا بنحجم النار
جمبل النص
له عدة دلالات
وجميل أنت بدون استغلاق
المدونه رائعة وتستحق
شاعر عامية

احـمـد عصـام said...

قيثارة الأحلام
أشكرك وأتمنى أن يدوم الود
كرانيش
يمكن البدائل دي أقصى البدائل المتاح و على فكرة بابا أنا بابا أنت بابا بتاعنا كلنا
دراما كوين
نعاند أه نسكت لأ .. و تحديداً الأختيار دا حق كل واحد فينا
هبه
لأ ينفع وفي الحاله دي برده هكتب لأن أنا كده كده هكتب كيف بقى هنعمل إيه
وخير الكلام ما قل ودل
البدوي اللي مش أخرس
عندما تأتي الإشادة من شاعر مجيد تكون بمثابة وسام على صدري

mohamed said...

اب غيرة ازاى يا ياأحمد
عمر ما يكون ليه بديل

انت عارف اب يعنى
ايد بتحفر مستحيل

حتى لو قدم القميص
من ابويا شىء جميل

كل واحد ليه عيوب
بس أنسى أبويا صعب

هو شكل ذكرياتى
بين ضلوعى كان لى قلب

خلى احساسى يحس
خلانى ارفض العمود

لو رحل عنى ابويا
مستحيل تانى يعود

بس فاضل الاختيار
قميص قديم وياه ابويا

ولا جديد ومعاه عمود


جميل ما كتبت اجدت التعبير
واعجبتنى قصيدة العمود الرائعه
ولكن للابوة اعتبارت اخرى
قد لا نرى الا عيوب
ولكن اذا بحثنا عن المميزات سنراها
داخل انفسنا
اسعدنى تعليقك عندى
تحياتى
اشوفك بين حروفك

شجره الدر said...

انا عندى حل
شوف اب غيرو وبرضه ولع ف القميص مانت اكيد زهقت منه
ابوك والقميص
خفيفه بس حلوه يااحمد
عجبتنى
تحياتى

marktwain said...

ياعم ايه الاب البخيل ده
بيقولوا كارفور عاملة عرض في شهر مارس جايبه ابهات صيني ولو اشتريت ابين تاخد التالت هديه

حلوة كالعادة
نسيت ازيك و اخبار ايه

عـمـرو قـطامـش said...

ندعو سيادتكم لحضور العرض المسرحى "انت دايس على قلبى" لفريق المسحراتى على مسرح روابط بجوار طلعت حرب من يوم 5 مارس حتى 12 مارس و الدعوه عام
مش هاعلق عشان انا قلتها كمفتتح قبل ما تتنشر هنا يعنى انت عارف رايى .. اعزم ناس و تعالبا يا صحبى

she3ila said...

مش مهم ان القميص قديم المهم ان ابوك مخبى خيرة والاهم انك ازاى ساكت وراضى ببواقى خيرة وصدقنى دا مش ليك لوحدك دا نفس القميص كلنا لابسينة الله ينورعليك اخوك الكبير / شعيلة

جسر الى الحياة said...

المشكلة انك مش هتعرف تشوف اب غيره كان غيرك اشطر
تحياتى

محمد إبراهيم محروس said...

جميلة
وبسيطة
وقايلة
بجد هايلة
خالص تحياتي
سعيد بالمرور من هنا

Misho0 said...

اسمحلي يا عمي بالمعارضة لأني دلوقتي عايز ابويا ذاتة حتى لو كان معاه و ملبسني (نفس القميص) لكنه اتوفى فعلينا اننا نلتمس لهم الأعذار و نستمتع بحياتنا معاهم قبل ما نفقدهم
و تعالى نخرج من الجو ده بالقصيده المعارضة

نفس الفطيس
بقالي سنة ما بشوفشي غيرة
احساس يغيظ
لما الطريق يكون فيه مية
و ماتشوفشي زيره
في الحالة ديا
يا تسلف الراجل زمزميتك
يا تجيبله علبة...
لبن بخيره

أحمد سلامــة said...

انا قاعد اقزأز في المدونة بقالي حبه
بس تسلم ايدك وكتاباتك
ماشاء الله عليك
تسلم ايدك يا ابو حميد والله

وبمناسبة القميص
ربنا يستر وميجيش كمان شهرين يقوللي ده اصلا مش قميصك

سلامي لك